Dialektik da Zasetzung - WESCHDIZA


Aus den Archivn von da aca, 27.11.95

Da Raphi (Raphael Kronberger):

	de weschdiza (vo da weschdiza)

  da k. u. k. hausmasda hot gsogt i soi hoid an sraed schtatn, oba wen

  intaressiat scho wos izam sogn hob ? do gibts ned vü zam dazoen, und
  waun i daun nochdenk ueba mi muas i wieda ausm fensta schaun und i
  deng ma do kennt i mi jo aa aussehaun, und des tuat ka guat ned.

  owa i hob ma dengd vielleicht is jo do wos zmochn wei mia is bewust
  woan dos des morbide, oiso de dauande ausanaundasetzung mid oim wos
  hoit a nua iagndwia grauslich und scheislich is in dera woed, mi
  iagendiwie arinnat aun so a senkgruabn de dauand stingd und brodln
  tuats und so und du dengsda waun i do einifoi is aus und so. i hob
  ma docht iagendwie bin i jo aa genau so wia de senkgruabn.

  do hob i ma docht dos mei psuechologisch-intellektuella morast, mei
  soebstzasetzung und des aufweichn vo jeglicha woanehmung, des
  aufgeng in soana oat fruekindlichm seelenbrei, so a geistiges
  milupa, nua hoid stingad, dea zasezte baaz zu dem wos si mei
  persoenlichkeid imma mea entwicklt, dos des ollas vielleicht aa a so
  a naehrbodn sei kennt fia a neiche woanehmung, a neiches vaschteng
  vo si und da woed, so a neicha aunfong hoid. und des is jo a wos
  guads, so wia aus am gaerungsprozess bei da senkgruabn iagendwaun a
  neiches lebn wiad.  i hob mi scho gseng wia ma blumaln aus de oan 
  aussawoksn.

  und es is jo eigentlich aa gaunz logisch, dos in dera woed, wos
  hintundvuan druntaundrueba geht, de neiwoin bei uns, i hob gheat den
  Siih Eiih Eeeh woins aufloesn, das in dera woed grod da weana, dea
  jo traditionellaweise an besondan bezug zum tod und dem gaunzn hot,
  dos grod da weana duach sei schtendige soebstzasezung praktisch zum
  humus weadn kunnt fia de intellektuelle bluetezeit des nekstn
  joatausnds, wauns de gebn soitat.

  wei duach so a kollektives buendln und reorientiern dea
  todestriebs-enagien, sozusogn die transferierung dea fauligen und
  soebstzaschtoerarischn enagie auf a uaspruenglichare fuam, fost so
  wia a umgekeata entropietod, a unglaubliches potential freigsezt
  wean kennt, wia iagndsoa supa supa supa kunstduenga wo nochan ois
  wokst ois wia, nua hoid auf geistiga ebene, deswegn hob i ma docht
  das ma diesn gaunzn pfuhl aun geistiga foilnis, des gschimpfat 
  und den grant und de raunzarei wegn da deppatn nochbarin, des ewige
  keppln weist wiedaramoi in so a scheiss hundstrimmal einigstiegn
  bist und laut schreist i darschias de veamaledeite kanaillie und
  daun kummt a so a muattal midm schosshundal daher und kepplt daher
  dosd eingschpeat gheast, und des gsicht vo de leit in da frua und
  imma wieda des gschimpfat und des gschimpfat ueba des gschimpfat und
  des ois, i hob ma docht dos ma des ois umwandln soitat in iagndwos
  positivs.

  deswegn hob i de weschdiza gegruendet, de weana schui vo da
  dialektischn zasetzung, vo dea i des anzige mitglied bi und wei mi
  des woat weschdiza so aun iagenda krautruladn earinnat hob i aa glei
  a maskottchen afundn, oiso ned so a wiaklichs maskottchen im
  eigndlichn sinn, wei des is jo sonst imma a so iagendwos lebendigs,
  sondan hoid de weschdiza-ruladn, wea wue kaun gean des rezept hobn,
  de is hoit jezt des maskottchen vo da weschdiza. 
  (des is jo aa eigntlich goa nix neichs, dos a kulinarische
  spezifikum so praktisch zum trega von ana idee wiad und aa im sinn
  vo unsara transkulturalitaet, wei mia san jo imahin a woedsproch,
  dad i de weschdiza-ruladn so wia de klaane schwesta vom buanheidl
  oda vo de mozatkugln segn, de wos jo aa eanaren siegeszug duach de
  woed angetreten hom.)

  i hoff es kents eich jezt aus und dats vue mehlen
  habedhere,

	da Raphi.


Mr. Bean-d:
  Na hobz des glesn? Dea Buasch hod Dalend! Des is a neicha Wind in da
  AZeeAaa. Wies wissz, bin i jo imma fia Kuitua in dera Gruppm
  eigschdaundn, und sogseng is da Raffi, da Neiche, a echde
  bereicharung do. Leida isa a weng suizidgefeadet, owa des weama eam
  scho no ausdreim bei a boa Bia.
  Raffi, moch weida so, i find, mia miassn uns aus da Mittlmaessiggeit
  aussazaan, quasi am eiganen Schoopf, und Du bist am richtign Weg
  dazua. Gradulazion, i hoff, des woa nua da Grundstaa zu ana echd
  filosofischn AZeeAaa. I mechd schwean, waun da Grisdian sein
  Njuussoewa hoibwegs aufd Rei griagt, wiad a da a ebmbueatige
  entgegnung einabostn.

  [Daunksche, daunksche - owa dea Artikl woa so genial, den howi afoch
   fia sich allanich wiakn lossn miassn. Mit aundaren Wuaten, mi is
   nix eigfoin. :-)]

  Oiso dere midanaund, de Balatschinkn ruafn.